Danas, 12. studenog učenici 3.a i 3.b razreda upoznavali su nematerijalnu kulturnu baštinu zavičaja s naznakom na nošnju, narodne instrumente i glazbenu ljestvicu. Tom prilikom ugostili su gospodina Pina Knapića, velikog poznavatelja kulturne baštine i običaja Labinštine (i noneta naše Lane) i gospodina Đina Bučića, svirača narodnih instrumenata.
Koko nan je bilo ćemo van pravit sada jer smo so vreme gonali po naše, na cakavice jer so deca od trete klasi va projekte od ,,Ćakulodah na ognjišće”. Prvo nan je barba Pino prežento narodni inštrumenti ki sopo sopci na Labinšćine. Poce je s frulico ko so sopli naši stori dok so cuvali vosce, pok volarice ke so sopli dok so cuvali voli i goveda. Bilo je tuka šurlah, dvojnicah, veleh i mićeh roženicah i meh s ken se pošne i fini. Saki inštument nin je barba Đino zasopa pa su mogli cut koko sope na tonko i debelo. Barba Pino nin je špjego od kega dreva se dela ka inštrument. Doznali so ca je pisak, koko sope i kede se spravi kad se fini sos. Navadili so da se meh stori od kozlićove koži. Nekadar je sopac na mehe kumpanjo i mlodo za se oženit, a Barba Đino je to stori više puti. Bilo je tu taronjkanja, balona i drugeh versi. Prvo nego su poceli vadit za nošnji, zasopli so ,,Šete paši ” pa so naše Lana i Monika (ke toncajo va RKUD-e va Raše) zatoncale, a deca so hi kumpanjali. Barba Đino nin je prežento muško nošnjo (bareta, stomanja, kržot, brgeši, vunene holjovi i postoli), a Lana žensko (facol, stomanja, kotula, pos, traverša, geti i postoli). Doznali so da je za vreme Veneciji poli bogateh bilo cuda lepeh kusi robi i ku je co ustalo zamali so ljudi za delat nošnji. Nošnji so se obukevale za veli blagdani, za piri, za poć na samonj i hmaše, i za fešti. Cuvajo se kako suho zloto.
Barba Đino nan je špjego i ca so delali mladići, sopci (kad ni bilo mobitela) na ognjišće. Deca so zajno rekli da bi njin mobitel joko fali i da bi njin bilo joko dosadno. Intanto danas nan je bez mobitela pasala jena lepa ura va konte i mužike. Deca so joko rado nasluhala saki vers istarske škali. Pofolili so i Pineta i Đineta, a oni so bili kuntenti jer znojo s koliko kuntenteci i draginji cuvajo valori našega kraja.
P.S. Fala van ca cuvate starino ko jimamo radi, da se ne zatare!
Maeštri: Lorena Dobrić i Sanja Škopac
