DE SE NE ZATARO UŽONCI NI STORI MEŠTJERI

Bura zi! …limba po vlaški…
Dobar don! … zajik labinjonski…
Ali, ne, neee…Vlaški, ćiribirski ili koko neki receju, istrorumunjski, ni naša današnja štorija.
Va utorak, na 10.morca mi smo opet imeli jenega gosta va našemu razredu. Ova put, priša non je Anton Tone Ljubičić, šlovek ki ne samo da zno gonat po vlaški
(lahko njemu, kad je on po rojenju z Brda, sela zgor Šušnjevice), nego zno i jedon stori meštjer, kega još malo ki zno. Barba Tone je meštar za ples „sprtu“ (košaro) od
„beke“(žukvi, veje).
Od njega smo najprvo culi kede i koko žukvi rosteju, kada se hi reže, koko se hi pronto za ples, koko se hi cuva da se ne osuše prvo nego se duperoju. Pokozo non je i svoje
ordenje ko mu robi za delo – klešća, koserica, škari za trsi, a najvažnije…puno pacjenci, dobre volji i ljubof, cuda ljubavi!!!
Culi smo i štoriju zoc su ljudi nekada pleli košari. Va vreme kada ni bilo najloni, borši – ljudi so va košarah nosili verduro, fruti, joja, hronu, ma se ca je robilo. Koko va ono
vreme ni bilo kede kupit, a nanka neso imali previše beci, ljudi su si doma delali stvora da jin življenje bude malo laglje.
Barba Tone je košari navadi ples od svojega noneta i jenega svojega suseda, toko ca hi je špijo dokle su delali. Provo je storit jenu košaru, ka mu ni bila prelepa…pa drugo, pa
treto…saka nova bila je se bolja i se lepca. Koko su leta pašivala, bi je se bolji i se žvelteji za ples. Danska vadi ples košare te mlaje – seh keh imajo volju i želju navadit ta
stori meštjer, ki se pomalo gubi.
Cuda tega non je pravi…cuda tega je i ostalo za pravit. Ma nas je najviše interešalo koko i ca se to plete. Nesmo više mogli cekat da va ruki zamemo žukvi i da mi to provomo.
Obruči za košaru su bili ponapred pronti, a saki od nas je z barba Tonetovu pomoć ple jedon parat košari. Malo…pomalo…prišli smo i na kroj, košara je bila finjena!!!
Kad se mole ruki slože…lahko se more, ca god…!!!
A još i kad imate takovega meštra, onda je se lahko.
Ma vrteli so se non okolo glovi i neki drugi pensjeri…
Do leta bi robilo storit puno košari i dobro hi prodat va sezoni kad prido turisti.
Se smo va jedon hip zracunali…ki će delat, ki će prodavat, a ki će brojit beci…
A naša maještra?!? Ona je bila joko kuntenta i joko se pretendila ca non je va razred dopeljala toko vrednega Brijana, perke i ona von je na pol Brijanka. Z sen gušton non je
gonala svoji rikordi o nekemu njenemu vremenu, lepemu vremenu kega je pasala poli none i noneta na Brdi.
Ne kapimo mi, ne, to pasano vreme, mi smo moderna deca, ali sejno – bi non je veli gušt ples „sprtu od beke“.
Za kroj, naša je Katarina dobila jedon regol – molo košaro ka joj je cela rivala va pes.
A znote zoc?!?…Perke se i Tonetova nona zvola…Katarina!!!
Išuma, kemu gre…gre!!!

A semi nami drugemi – ostala je košara ko smo skupa opleli, da nas vajka spameti na lepi don, na don od storih meštjeri.
Ki zno, forši će i neki od nas jenega dneva ćepat žukvi va ruki i ples košari?!?
Da se užonci ne zataro!!!
A za kroj…
VELOOOO fala barba Tonetu ca non je sacega lepega gono, cuda tega non špjego i stori meštjer non pokozo. Bilo non je…Cagodar!!!
Virec nåzad…Pridite non opet…

deca 4.b razreda, Keti i maještra Marijana