Petak…???
Trinajsti…???
Jaaa…pak…CA…?!?
Non, decami i maještrami 4.razreda, bi je bolji od bilo kega dneva va pasanoj šetimoni –
va dobroj kompaniji, uz dobre rock i blues klasike i našega specijalnega gosta ki non je
priša direto z Zagabrije.
Cekali smo ga, cekali …skoro dvo leta…i finalmente…docekali!!!
Priša non je on – Toni Peruško – naša labinjonska zvezda TV Showa Superstar.
Naša je maještra malo š njen poćakulala i sacega ga pitala: kamo je hodi va školo, ca ga
je pježalo više, a ca manje dokle je bi školon, kako je i zoc pošne kantat i sos, kako je to
živet za mužiku i bit va svete mužike.
A i mi deca imali smo puno…punoooo tega za ga pitat, sve smo oteli znat, sve nas je
interešalo…Ma Toni je priša sos i kantat, a ne samo ćakulat. Ze je gitaro va ruki i popeljo
nas malo kroz njegov svet notah i kanconah ke ga veselijo, ke ga nosiju , ke su mu
pustile traga va življenju i dole mu pensjeri za neke nove stvori.
Malo smo i mi š njen zakantali – se ono ca smo znali, puno se veseli i smejali, toncali i
zabovljali. Ma propjo smo si ga uživali!!!
Ura vremena s Tonijen pasala non je koko…zgoret!!!
I ca još reć, nego…veselimo se nekin novin kanconami, nekemu novemu druženju…
A Toniju, fala…VELOOOOOO fala ca non je donesa punooooo pozitive, ca nas je toko
lepo propeljo kroz svet rocka i bluesa.
Od srca…FALAAAA !!!
deca 4.razreda i maještri Andrea i Marijana
