Jesen va Labine  (1. nagrada - mlađi razredi)

Va Labine jesen je pocela.

Veje karvovo

ko jabuki na gronah.

Kostanji po glove i na tle,

tići se prontujo,

a otrocice i otrocići se igrojo.

Jesen je prišla,

leto je šlo.

I tako van je va mojen Labine.

                                              Luka Mikuljan, 4.b

Ren vonka (1. nagrada- stariji razredi)

Da van pravin štorijo od mojega oca ko don danaska cujen:

          Prideva son od školi doma i son se treba vadit, ma son bi štupido pa neson. Saki vrajži don bin gono matere ren vonka. I tako bi paso moj don.

Ren vonka, ren vonka – ca me je šajeta udrila za to ren vonka.

Tako son ja za školo bi lahkodelovac. Pa son sada vajka vonka, na ribarije, da ćepon kukovo ribo i prodon da bi moji deca imeli lepi život. Sada njin provljan to mojo štorijo da ne budo kako ja.

I, fala bogu, poli njih ni ren vonka.

                                                            Maria Lucia Fonović, 6.a

More (2. nagrada- stariji razredi)

More je moje življenje,

Onako plavo, freško, bistro, duboko…

Kada ren va more

i zapren oci

mojeh brigah više ni. 

Zamen ariju, zaronin do dna

da z rukami i telon ticen 

bogato dno od mora.

More mi vajka nešto regalo

jedon mići kamik ili dvo.

Bačin mi anke nekad do.

Va more son vajka kontenat.

More je moje življenje.

                                             Lukas Verbanac, 5.a

Kada bimo bili beštije (3. nagrada - stariji razredi)

Kada bimo bili beštije,

ne bimo mogli

ćekulat s ljudi,

mogli bimo

samo s beštijami.

Kada bimo bili beštije, 

se bilo drugošlje,

si bimo bili

inšempjani i strenjeni.

Kada bimo bili beštije,

nekada bi nan bilo zima,

nekada ne bimo jali ni pili.

Teško je bit beštija.

mi ljudi ne znomo 

kuko bimo onda živeli.

                                              Reana Gobo, 5.a