KOVA JE NASA...ONDA, SADA I ZAVAJKA...
Autor: Sanja Škopac, 3. 3. 2016.
Sreda, 2.morca 2016.leta. Lepi don, blovo nebo zgor nas, sunce ca nan se z gušton smeje i zove nas da gremo vonka z školi. Vetrić pomalo šumi i nešto nan gono, ma joko, joko kalmo...deboto da ni ne cujemo. Ma ca, ca to vetar gono? Smo malo poslihali i smo rivali cut... KOVA...KOVA JE NASA! KOVA JE NASA! Ma zoc to vetrić šumi? Ma ca i on zno da su naši labinski kovari pred 95 let na ova don storili svoju Labinsku republiku? Sunce ko se smeje i šum vetrića popeljali su nas decu Produženega boravka i naše maještri do Pjacala, do našega šohta.
Lepo smo se tamo komodali na drveni bonjki i se spametili labinskega kovarskega vremena. Perke, ki od nas ni imo baren jenega kovara va fameje?!? Spametili smo se sega onega ca su nan gonali naši nonenti, pranoneti, prapranoneti...crnega krbona, teškega kovarskega življenja, kovarske bandjere, bači, kovarskih svećah na karburo, velih nesrećah va kove, Labinske republike...sega onega ca smo culi pravit, ca znomo o pasanemu vremenu našega kovarskega Labina.
Ma smo si anke i zakantali jeno lepo kovarsko...
„Danaska kovari ni, crni više neso,
na nebe su skoro si, beli anđeli.
Non su tuteka pustili se lepo i dobro,
cuda fameji hronili, zavajk hi pametimo! „
A onda, si skupa otpravili smo se do Lamparni i šli malo pošpijat koko zgleda „Bijenale industrijske umjetnosti“, ca su nan to parićali ti artišti z celega sveta. Koko da smo jeno malo premoli da se to kapimo, da razumemo to umjetnost, ma sejno smo uživali va svete teh litrati, teh štramori i artišti.
Ma forši smo moli, ma se joko pretendimo da smo i mi jedon moli parat te vele labinske kovarske štorije.
I ca reć za kroj, nego jedon kovarski - „SRETNO!“
deca Produženega boravka,
maještri Adriana i Marijana
