"Ca je ča"
Autor: Silva Tenčić Stemberger, 17. 11. 2016.
Utorak vecer je va lepe, kovarske librerije našega groda bila fešta ot domoće besedi. Na jenen meste su se spravili si oni ki domoćo besedo, naše lepo ca, nose dimboko va sebe i štimojo svoji koreni. I mići i veli so va ven mesece od libreti napisali mirakoli cuda vers. Deca naše školi so sa svojemi provemi maeštrami (Nirvana Golja, Doris Golja, Dilana Dagostin Mohorović, Marina Franković, Sanja Škopac, Klaudia Blašković, Dean Nestorović i Silva Tenčić Stemberger) velo delo storili i svojo poezijo poslali na Literarni natječaj „Ca je ča“. Komisija ka je vibirala najbolje je pofolila nekoliko našeh dece (Dorijan Tomičić, Dominik Jović, Toni Diminić, Tara Ruklić, Patrik Rudan, Lucija Zupičić, Gita Glušić, Adriano Glavičić i Dino Peruško). Si oni so prešteli svojo poezijo i dobili veli pljesak i zahvalnico. Lana Sergo ot Rapca je sa svojo poezijo „Podzimak – najbraveji pitor“ dobila prvo mesto za mlaji deca, a Dino Peruško s poezijo „Doš“ drugo mesto med starejemi decami osnovneh školah na Labinšćine. Joko nan je drogo da se ne zatare domoća beseda i se ćemo storit da i naši deca gonajo i pišo po nase. Bravo za seh!!! Dean Nestorović i Silva Tenčić Stemberger Podzimak – najbraveji pitor Najbraveji pitor je priša, si boški, si đardini je oboša. S pinelon hi je pituriva va si kolori od zlota, bez kolora je ostala samo kakova kalota. Va boške je pusti svoji lepi kolori, kunji je stavi na barkoni i va armaroni, mat moja mila – ke odori! Pitor paseva s vetron va vlosah, okle njega dožlji, sunce zlotno se više od njega biži. Na krove od moje kući tićan je njozlo stori, nutra hi je skri da ni mrzlo ni. Mići tići na tonko i debelo kantojo sako jutro kada gren va školo. Sa kontenta s boršu tecen s pitoron našen ruko pod ruko gren. Lana Sergo, 3. PŠ Rabac Doš Pomalo, s dve, tri kapljice se najovi, a onda je priša. Mrzal po krove udriva. Sakega je zmoci, i šloveka i breka. Se kalanice i si koli je napuni. Se nan je zali, a nas je zledi. Bistro nan je nebo s oblaki prekri, ma pokle ga je bura odnesla, a nami sunce prnesla. Ma, još vajka va zrake doš diši... Dino Peruško, 5.b Si drugi versi ki so deca napisali za "Ca je ča" morete noć na sejne pađine - pod Školske novine!
